ORÍGENES

Leti’e juntúul ajboonil uts tu yich u kanik ya’ab ba’alo’ob tu junal, síijnaj tu k’íinil 24 ti abril tu ja’abil 1977 tu kaajil Maxcanu. U chúunbalil u boonile’ ti’ u chichnil tu kajsaj, chen tu junal tu káajsaj, ka jo’op’ u nojochtale’ jo’op’ xan u ma’alobkunstik u meyaj boonil, tu áantubaj yéetel áanalte’ob, bey xan yéetel u e’esajilo’ob u jel ajboonilo’ob kajakbalo’ob way Yucatane’ yéteel u jel kaajo’ob. Ichil u estilo pictórico yéetel temático ku k’aba’tik “pintura figurativo”, ti tu'ux ku jach chíikpajal le costumbrismo yéetel le desnudo artístico.

Tu ja'abil 2013 ti’ tu kaajale’, tu káajsaj jump'éel meyaj uti'al u ka'ansik boon ochel yéetel boonil, le múuch’ meyajo’ tu k’aba’taj "Taller de dibujo y pintura: Caminantes”. Le múuch’ meyajó tak bejala’e’ layli ku ts’aik xook ichil u kaajal yéetel tu noj kaajil Mérida.

 Leti’e’ ts'o'ok u táakpajal ti' jejeláas e’esajilo’ob yéetel múuch' meyaj ajboonilo’ob beyxan ti’ e’esajilo’ob chen tu junal, ti' jejeláas kaajo’ob way Yucatane’.